შესავალი

რა არის ბიზნეს ინტერნეტბანკის API

API შესაძლებლობას გაძლევთ ჩააშენოთ საქართველოს ბანკის ბიზნეს ინტერნეტბანკში არსებული ფუნქციონალი თქვენს საბუღალტრო ან სხვა ბიზნეს პროგრამაში და გაუმარტივოთ ყოველდღიური ოპერაციები თქვენს მომხმარებლებს, რომლებიც პროგრამიდან გაუსვლელად შეძლებენ ბიზნეს ინტერნეტბანკის ისეთ ფუნქციონალზე წვდომას, როგორიცაა:

• გადარიცხვის დოკუმენტების შექმნა - მომხმარებლები თქვენს პროგრამაშივე შეძლებენ ეროვნულ და უცხოურ ვალუტაში გადარიცხვებისა და კონვერტაციის ინდივიდუალური და პაკეტური დოკუმენტების შექმნას.
• ამონაწერის მართვა - მომხმარებლებს აღარ დასჭირდებათ ამონაწერის ატვირთვა. თქვენს პროგრამაში ხელმისაწვდომი იქნება ზოგადი ინფორმაცია პირველ 1000 ჩანაწერზე. მომხმარებლებს საშუალება ექნებათ თვალი ადევნონ ამონაწერის გლობალურ თუ ყოველდღიურ ნაშთებს მათთვის სასურველ პერიოდზე.
• ნაშთის შემოწმება ანგარიშზე - მომხმარებლების საოპერაციო სივრცეში გამოჩნდება მათ ანგარიშებზე არსებული გამოყენებადი და მიმდინარე ნაშთები.
• ვალუტის კურსების კონტროლი - თქვენს პროგრამაშივე იქნება ინტეგრირებული ინფორმაცია ეროვნული ბანკის სავალუტე კურსების, მათი ისტორიის, ბანკის კომერციული ან კროს კურსების შესახებ.
• დოკუმენტის ხელმოწერა - ამ ფუნქციონალის ჩართვის შემთხვევაში კომპანიის თანამშრომლებს ექნებათ უფლება, თავად შექმნან გადარიცხვის დოკუმენტები თქვენი პროგრამიდან და ერთჯერადი კოდით თავადვე დაადასტურონ ხელმოწერით.
• ავტომატური დადასტურება - შექმნასთან ერთად, თქვენ ასევე შეგიძლიათ მოითხოვოთ გადარიცხვების ავტომატიზაცია და ხელმოწერის გარეშე დაადასტუროთ ტრანზაქციები.

რა არის საჭირო ინტეგრაციისთვის

სერვისების ინტეგრაციის გასამარტივებლად ჩვენ სატესტო გარემო და გამარტივებული დოკუმენტაცია მოგიმზადეთ, რომლის მეშვეობითაც API სერვისების ჩაშენება პროგრამირების საბაზისო ცოდნით არის შესაძლებელი. ინტეგრაციისთვის აუცილებელია, რომ ორგანიზაციას ჰქონდეს bonline.bog.ge ანგარიში და სისტემაში შესასვლელი რეკვიზიტები. გამოსაძახებლად, პირველ რიგში, თქვენი აპლიკაცია უნდა დაარეგისტრიროთ შემდეგ ვებგვერდზე: bonline.bog.ge/admin/api რეგისტრაციისას უნდა მიუთითოთ აპლიკაციის სახელი, დასახელება უცხოურ ენაზე და თქვენთვის სასურველი ლოგოს მისამართი (სასურველია https პროტოკოლზე და ზომა არაუმეტეს 400x80 პიქსელისა). თუ არეგისტრირებთ web კლიენტს, მაშინ ასევე უნდა მიუთითოთ ვებმისამართი, რომელზეც მოხდება გადამისამართება აუტენტიფიკაციის დროს. რეგისტრაციის შემდეგ აპლიკაციის დეტალების გვერდზე გამოჩნდება აპლიკაციის იდენტიფიკატორები, რომლებიც დაგჭირდებათ აუტენთიფიკაციის მოთხოვნის დროს:

• client id
• client secret
• redirect uri (მხოლოდ web კლიენტის დროს)

სერვისების სატესტო გარემოზე წვდომის მოსაპოვებლად მიმართეთ თქვენს ბიზნეს ბანკირს ან შეავსეთ განაცხადი.

პროტოკოლი და ტექნიკური სპეციფიკაცია

API-ს არქიტექტურული მიდგომა - Restful.

ონლაინ განვადების აპლიკაციის პროტოკოლი: HTTP/1.1. უსაფრთხოების გაზრდის მიზნით, აუცილებელია API-ს ყველა მეთოდის გამოძახება https-ის გამოყენებით, რომელიც წარმოადგენს http პროტოკოლის გაფართოებას.

სერვისის გამოძახების ტიპი - სინქრონული.

უსაფრთხოების პროტოკოლი - OAuth 2.0.

მხარეებს შორის ინფორმაციის გაცვლის უსაფრთხოების სტანდარტი - JSON Web Tokens (JWT).

API-ს მისამართი (BASE URL): https://api.businessonline.ge/api

ყველა გამოძახების შემდეგ დაგიბრუნდებათ Header, სახელად x-correlationid, რომლის მნიშვნელობა უნიკალურია და რომელიც ამ მოთხოვნის იდენტიფიკატორია. რეკომენდებულია ამ იდენტიფიკატორის თქვენ მხარეს შენახვა, რადგან ხარვეზის შემთხვევაში ეს დაგვეხმარება თქვენი მოთხოვნის ზუსტად პოვნაში. დამატებითი ინფორმაციისთვის დაგვიკავშირდით ელექტრონულ ფოსტაზე: customerservice@bog.ge